مكاتب التوظيف: الخدعة الكبري في مصر (الحلقه الثانية)

                  مكاتب التوظيف ( الحلقة الثانية) 

 في المقالة السابقة توقفنا عند أخذ ورقة التعاقد وبداية رحلة المعاناة حلم الذهاب إلي موقع العمل.  

طبعا العمل يكون في اماكن بعيده جدا تحتاج الي مجهود شاق للوصول إليه، حيث يتم التنقل بين وسائل النقل المختلفه بمعني تركب سرفيس ، تنزل منه تاخد تومناية صغيره، وبعدين يستقر بك الحال ياتكمل مشي لو حابب تحافظ علي فلوسك، ياتاخد تكتك يوصلك. 

المهم بعد كل التعب ده طبعا حضرتك فاكر انك رايح موقع الشغل وهتدخل مكتب تقدم ورقة التعاقد، طبعاا ده حلمك وحلمي وحلم كل واحد، عارف ليه لإن ده الصح.

المفاجأه التي  ستذهلك انك عند محاولتك التعرف علي موقع العمل ستجدك تلقائيا تعرفه من خلال وجود مجموعه تحمل حقائب وتنتظر مثلك،  ستتعجب في بادئ الامر ولكن سرعان ما ستعرف انك امام المكان اللذي ستسكن بداخله وليس موقع العمل. 

تلقائيا ستجد نفسك تسأل من انتم؟  وكأنك مندهش،  ليسارعك احدهم بالاجابه ( مش انت جاي عشان الشغل). 
 لتجاوب بنعم،  فيبدأ التعارف.

ومن ثم تعرف انهم مثلك تماما وان مشرفا سيخرج بعد قليل، وبالفعل يخرج شابا من الممكن أن يكون أكبر منك في السن،  او أصغر،  يسألك تبع اي مكتب أنت؟،  فتجيبه، ثم  يطلب منك ورقة التعاقد فتقدمها له وتقدم بطاقتك الشخصيه.

                                  تحذير

ان كان عمرك اقل من 18 سنه انصحك بعدم الذهاب لأنه لايقبل اقل من ذالك،ويضيع عليك المبلغ الذي دفعته في المكتب،فتأكد من ذلك.

يخبرك بمواعيد العمل، والأجر  ، وعدد ساعات الراحه، وطبعا ستجد اختلافا كبيرا بين اتفاق المكتب وكلام المشرف ، وطبعاا حضرتك هتسألني مش في تعاقد ، هقولك اه في تعاقد بس مش علي تفاصيل العمل التعاقد مع المكتب نفسه انك تبعه وفي حالة عدم ارتياحك في العمل، ترجع للمكتب قبل 14 يوم عشان ينقلوك الي موقع تاني وبهدله تانيه وهكذا.

ان ارتضيت بالأمر الواقع فلن تجد الراحه التي تتمناها ستجد مجموعه من الشباب لايقل عددهم عن 20 بل يزيد.

 هذه المجموعه هي ورديتك الصباحيه او المسائيه حسب تحديد المشرف ،  ولك أن تتخيل كل 6 اشخاص في غرفه،  ومرتبه أرضي للنوم ،  وهذه المرتبه في أسوأ حالتها ،  وحمام مشترك بالدور ،  وعدد3 او4 جردل لغسيل الهدوم ،  وللعلم مافيش منشر ،  حضرتك أما تغسل تخرج تشوفلك أي جدار تنشر عليه هدومك ومتنساش حجر تضعه علي هدومك أصل مش هتلاقيها. 

لك سيدي أن تتخيل حجم معاناتك بعد يوم شاق في العمل، فبدلا من الراحة تحمل هم انك هتروح السكن لما ينتظرك من أدوار، فدخول الحمام بالدور، والغسيل بالدور. 

معلومة أخيره

طبيعة العمل في اي مكان في الكون ان الشهر يبدأ يوم1 وينتهي 30 او 31  الا في عمل مكاتب التوظيف ، فالشهر يبدأ  يوم 1  وينتهي  يوم  30 او31  بس حضرتك مش هتقبض اجرك غير يوم يا 8 او 10 في الشهر الجديد، ببساطه يحجزولك الكام يوم دول عشان تفضل في العمل. 

                 ياريت ياجماعه لو الموضوع عجبكم 
   تشاركوني بتعليقاتكم /  للعلم  هذه المقالة عن تجربه شخصيه.